Jógakennaranám 200 tímar
Hatha og vinyasa
Amarayoga býður upp á jógakennaranám sem er skráð hjá Jógakennarafélagi Íslands og Yoga Alliance of America. Kennt er yfir heilan vetur til að hámarka gæði námsins. Mikil áhersla er lögð á að halda nemahópnum fámennum til að tryggja að nemarnir hafi góðan aðgang að kennurunum meðan á náminu stendur og svo áfram um ókomna framtíð. Útskrifaður nemi verður hluti af samfélagi Amarayoga kennara sem halda hópinn á Facebook.
Ath að eingöngu eru teknir inn 12 nemar í senn.
Þetta nám veitir alþjóðleg réttindi til að kenna hefðbundna jógatíma.
Veturinn 2023-2024 fer 200 klst grunnnám af stað í Amarayoga í 14. skipti! Kennslan fer fram á 7 mánuðum, eina helgi í mánuði. Kennt er 4 helgar fyrir áramót og 3 helgar eftir áramót. Nemar fá fyrirlestra gegnum netið og við hittumst vikulega í jógatíma þar sem vel er farið yfir stöðurnar, nemendum leiðbeint og stöðurnar lagfærðar. Auk þess býðst nemendum að nýta sér tíma stöðvarinnar án endurgreiðslu meðan á náminu stendur. Námið er viðurkennt af Jógakennarafélagi Íslands og nýuppfært samkvæmt nýjustu alþjóðlegum stöðlum. Hafðu samband ef þú vilt slást í hópinn og fáðu nánari upplýsingar.
Við förum yfir sögu og heimspeki jóga, skoðum vel 50 mikilvægustu jógastöðurnar og skoðum mismunandi hefðir sem eru vinsælar í dag. Við fáum sjúkraþjálfara í heimsókn sem fer yfir anatómíuna. Við förum í kennslutækni, hvernig gott er að byggja upp jógatíma, hvernig við komum kennslunni vel til skila osfrv. Við skoðum hugmyndina um orkulíkamann og módel Jungs um orkustöðvarnar. Við lærum um rekstur, bókhald og skattskil. Við munum gera okkar besta til að gefa góða þjálfun með æfingakennslu og gera allt til að undirbúa nemana vel til að starfa við jógakennslu.
Athugið að þetta er hathayoga nám sem þýðir að það snýst um líkamlegar æfingar sem ætlast er til að nemarnir taki þátt í. Við kennum hefðbundið hatha og vinyasa flæði.
Markmiðið með náminu er:
Að gefa nemendum öryggi við að framkvæma æfingarnar sjálf sem og að leiða aðra í gegnum þær.
Að kynna fyrir nemendum aðferðir til hugleiðslu og kosti þess að hugleiða. Að sýna hvernig kyrrð í huga helst í hendur við það að sitja í sjálfum sér af fullu öryggi.
Að gefa góðan grunn af anatómískri þekkingu sem aftur gefur öryggi í æfingunum.
Að þjálfa nemendur vel í að setja saman jógatíma af mismunandi gerðum, hvort sem þeir vilja leiða tíma í rólegu "hatha" jóga eða kraftmeira "vinyasa" flæði.
Að veita tækifæri til að æfa að leiða tíma og að koma fram fyrir framan hóp af fólki af öryggi og í ró.
Að fræða nemendur um bakgrunn kerfisins svo þeir séu vel meðvitaðir um muninn á raunveruleika og goðsögnum.
Að gefa forsmekk af því sem finnst í þessari endalausu gullkistu sem við köllum jóga.
Öll námsgögn eru innifalin, bæði handbækur og fyrirlestrar í gegnum vefinn. Einnig eru nemendur velkomnir að æfa í stöðinni meðan á náminu stendur.
Athugið að farið er fram á 100% mætingu svo ef þú tekur þátt þarf annað að víkja þessar kennsluhelgar.
Hafðu samband og við mælum okkur mót til að fara vel yfir uppbyggingu námsins og kröfur.
Nauðsynlegt er að staðfesta þátttöku með greiðslu staðfestingargjalds - óafturkræfu - upp á 50.000.- Staðfestingargjaldið dregst svo af heildarupphæðinni.
Verð fyrir námið er 385.000.- staðgreitt fyrir 1. september, en velkomið að skipta niður í 4 greiðslur. Við það hækkar verðið um kr 15.000.- og skiptingin gæti litið svona út: 50.000.- í staðfestingu, 87.500 1. september 2023, 87.500- 1. október 2023, 87.500.- í janúar 2024 og 87.500.- í febrúar 2024. Mörg stéttafélög styrkja félagsmenn sína til þessa náms.
Dagsetningar fyrir veturinn 2023-2024:
2-3 sept 2023
30 sept-1 okt 2023
28-29 okt 2023
25-26 nov 2023
13-14 jan 2024
10-11 feb 2024
9-10 mars 2024
Kennt er frá 09:00 til 18:00 bæði laugardaga og sunnudaga, með klukkutíma matarh´lei.
Athugið að auk helgana hittumst við vikulega í 2 klukkustunda jógatíma/vinnustofu þar sem kennari fer vel yfir stöðurnar hjá nemendum. Þeir sem búa utan höfuðborgarsvæðisins geta tekið þátt í vinnustofunum í gegnum vefinn.
Skráning er hafin á amarayoga@gmail.com!
Umsagnir nemenda
"Ég lauk kennaranáminu í Amarayoga vorið 2020 og verð Ástu og Amarayogastöðinni ævinlega þakklát. Námið var krefjandi, lifandi og gefandi svo ekki sé minnst á mannbætandi og heilsueflandi. Ásta er full af visku, fróðleik og reynslu sem hún deilir með nemendum af yfirvegun og góðvild. Ég er þakklát fyrir að hafa treyst innsæi mínu og valið námið í Amarayoga hjá Ástu."
Erla Björg Rúnarsdóttir
"Ég hóf spennt jógakennaranám í Amarayoga hjá henni Ástu Maríu Þórarinsdóttur síðastliðið haust og í stuttu máli sagt þá varð ég ekki fyrir vonbrigðum. Ástu Maríu tókst að auka skilning minn á jógafræðunum, ekki bara stöðunum/asanas sem jógaiðkun gengur svo mikið út á í vestrænu samfélagi, heldur einnig sögunni og þróun jógaiðkunar, siðfræðinni og heimspekinni sem liggur á bak við jóga. Fyrir utan beina kennslu einkenndist námið af hlýju, skilningi og góðum samræðum. Anatómíu kennslan var einnig frábær.
Þetta nám hefur gefið mér meira en margt annað nám sem ég hef stundað og mun halda áfram að gefa. Og það sem er best er að geta áfram leitað svara hjá Amarayoga."
Ásta María Hjaltadóttir
"Ég, persónulega, fékk mjög mikið út úr yogakennaragrunnnáminu. Þetta nám var skemmtilegt, fróðlegt, hvetjandi, bætandi og félagsskapurinn í Amarayoga, bæði í yogakennaranemahópnum og í tímum með viðskiptavinum stöðvarinnar, var yndislegur. Það kom mér á óvart hversu mikið ég gat lært persónulega um sjálfa mig og almennt um heimspekilega mannbætandi eiginleika yoga veraldar á svona stuttum tíma. Þess vegna kviknaði ný hugmynd hjá mér – að skrá mig í framhaldsyogakennararéttindanám – sem og ég gerði um leið og hægt var. Mér finnst gaman að skora á mig, prófa nýja hluti og fara út úr þægindarammanum mínum. Svona finnst mér að ég gæti orðið betri fyrirmynd nemenda og viðskiptavina minna í Heilsuskólanum. Ég er þakklát fyrir þá þekkingu og reynslu sem ég hef öðlast í náminu mínu í Amarayoga og hlakka til áframhaldandi persónulegrar vaxtar og framþróunnar."
Tanya Dimitrova
"Kennaranámið í Amarayoga er bæði fjölbreytt og fróðlegt. Kennararnir nálgast efnið af opnum huga og gera sögu yoga góð skil auk þess að kynna nemendum mismunandi tegundir þess svo hver og einn geti fundið sér það áhugasvið sem hann vill svo síðar kanna.
Stöðin er hlýleg og yndisleg og tímarnir fjölbreytilegir og skemmtilegir."
Auður Bergdís
Kennarar: Ásta María Þórarinsdóttir (E-RYT500, YACEP) sér um stærsta hluta námsins og til aðstoðar er Íris Thorlacius Hauksdóttir (CYT500). Rakel Dögg Sigurgeirsdóttir, sjúkraþjálfari og jógakennari, sér um anatómíu stoðkerfis og Sólveig Jónasdóttir, viðskiptafræðingur og jógakennari, kennir ýmislegt um rekstur, bókhald og skattskil jógakennarans.
